1 Macc 8

b8.17 2 Mak. 4.11.

c8.22 1 Mak. 14.18.

Inoun Minimin ong mehn Rom

1 Sudas rongada duwen mehn Rom ar adamwahu ni mahwen oh duwen arail kin sewese me kin miniminiong irail. E esehda duwen ar kin kasamwohlong irail kan me kin men miniminiong irail oh wiahla kompoakepahrail. 2 Aramas akan padahkihong duwen ar kin pweida nan mahwen kan oh duwen ar wiewia ndand kan ong mehn Kaul kan, me re kalowehdi oh idingohng irail re en uhpah irail. 3 E pil rongada duwen ar kalowehdi wasahn kohl oh silper nan Spein. 4 Sang ni koasoandi keneinei oh ngoang, re kalowehkihdi wehio pwon, mehndahte wehio eh dohsang Rom. Re kalowedier nanmwarki kan en wehi doh kan me mahweniong irail; re kaloweiraildi douluhl oh kahpwalihirailla mehlel, kahrehda irail kan me kin luhwehdi kin idihdohng re en uhpah oh kihda daksis ong Rom nan sounpar koaros. 5 Re mahweniong oh kalowehdi Pilip oh Perseus, nanmwarki kei en Masedonia; re pil kalowehdi wehi kan me iang nanmwarki ko mahweniong Rom. 6 Re pil kalowehdi Antaiokus Lapalap, nanmwarkien Siria, me mahwenkihong irail elepant 120, iangahki sounpein dak oahs, werennansapw en mahwen, oh lapalahn karis kehlail ehu. 7 Re poar mourihedi oh idingohng ih oh wiliepe kan re en kihda daksis laud, oh mweidohng mehn Rom aramas akan me re salihedi oh kolokol, 8 iangahki wehin India, Media, Lidia, oh ekei wasa kaselel nan ar wehio. Mehn Rom eri alehdi wasa pwukat oh kihong Nanmwarki Eumenihs. ^{▼▼ NANMWARKI EUMENIHS: Met iei Nanmwarki Eumenihs Keriemen, nanmwarki en Perkamum sang pahr 197-158 mwohn Krais.}

9 Sudas pil rongada duwen mehn Krihs ar koasoanehdi re en mahweniong mehn Rom oh kamwomwirailla. 10 Ni mehn Rom ar esehda duwen ar koasoandi re ahpw kadarala kaunen sounpei men pwehn mahweniong mehn Krihs. Kaunen sounpeio eri kaloweiraildi oh kihsang ar pwoud kan iangahki nair seri kan, adihasang sapwarail kan, kauwehla ar wasahn mahwen kan kaliduwihirailla lel rahnwet. 11 Re pil kamwomwala de kaliduwihala wehi teikan, deke kan, oh koaros me mahweniongehr Rom. 12 Ahpw re kolokolete ar ehuong wehi kan me re kompoakepahki oh apwahpwalih irail kan me koapworopworkin irail. Re kalowehdi nanmwarkien wasa keren oh doh kan, oh ni aramas akan ar kin rong duwen en mehn Rom ar wiewia kan, re kin masakirailda. 13 Mehn Rom kin sewese ekei aramas ako pwe re en wiahla nanmwarki, a ekei re kin kasapwiledi sang nan mwoalen nanmwarki. Ih duwen met mehn Rom ar ahneki manaman laud en kakaun nin sampah pwon. 14 Ahpw nan mwekid pwukat koaros, sohte mehn Rom men me song en kasapwilada pein ih ni eh pahn kidahng pohn moange nihn en nanmwarki de pwuhriong nan likoun nanmwarki. 15 Re koasoanehdi pwe pwihn ehu en kokouda me ohl 320 towehda, re kin tuhpene rahn koaros pwe re en kin wiekupwurki ire kan me pid kamwahupen aramas oh roson en wehi pokon. 16 Re kin mweidohng aramastehmen en kaunda wehio pwon erein sounpar ehu, re ahpw kin peikiong aramaso, sohte luwak de peirin nanpwungarail.

17 Sudas eri pilada Eupolemus, nein Sohn, oh eh pahpa kahlap Akkos, oh pil Sason, nein Eleasar oh kadariralahng Rom pwe ira en wiahda inoun meleilei nanpwungen mehn Rom oh mehn Sudia. ^b 18 Sudas wiadahr met pwehn kasaledekihala mehn Israel kan sang pahn manaman en mehn Krihs, pwe me dehde duwen mehn Krihs ar kaliduwihiraillahr mehlel. 19 Mwurin seiloak reirei oh apwal ehu, Eupolemus oh Sason ahpw lel Rom oh tuhwong pwihnen wiekupwuro. Eri, ira ahpw patohwanda audepen ilek me iet duwe: 20 “Sudas Makapius oh rie ko oh mehn Suhs akan kadarkitodo pahn kupwuramwail pwe se en wia at tungoal inou en meleilei oh miniminiong kumwail, oh se en wiahla sawasepen sapwellimamwail wehi oh kompoakepahmwail.”

21 Audepen inou wet kaparanda mehlel mehn Rom, 22 oh iet pasapeng me re wiahda nan pelien mete prons oh kadaralahng Serusalem pwehn mihmi wasao katamanpen inoun miniminpene wet: ^c

23 “Wehin Rom oh wehin Israel en kin paiamwahu oh pweida nansed oh nansapw kohkohlahte! Wehi pwukat en dehr ahneki imwintihti, oh mahwen en dehr lelohng wehi pwukat! Ahpw ma mahwen pahn lelohng wehin Rom de ong kompoakepah wehi teikan wasa ehu sohte lipilipil, 24 wehin Israel pahn sewese ni unsek sang ni kupwur mwakelekel nin duwen me anahnepe mie. 26 Oh ong irail kan me mahmahweniong Rom, mehn Israel sohte pahn sewesehki mwenge, tehtehn mahwen, mwohni, de sohp, nin duwen me inoupe wiawidahr Rom. Mehn Suhs pahn kapwaiada ar pwukoa wet ni sohte ale pweipwei.

27 “Pil ma paisuwed en mahwen pahn lelohng wehin Israel, mehn Rom uhdahn pahn sewese nin duwen me anhanepe mie. 28 Oh ong irail kan me mahmahweniong mehn Israel, mehn Rom sohte pahn sewesehki wehi pwuko mwenge, tehtehn mahwen, mwohni de sohp, nin duwen inou me wiawidahr Rom, mehn Rom pahn kapwaiada inou wet ni kapehd mwakelekel.

29 “Met iei duwen inou me mehn Rom wiahiong mehn Israel. 30 Ahpw ma pali riau pahn koasoanehdi mwuhr ira en kapatahiong de ketikihsang mehkot de ire ehu nan inou wet, e kak nin duwen nsenara, oh mehkoaros me ira pahn kapatahiong de ketikihsang pahn uhdahn manaman.

31 “Me pid sapwung kan me Nanmwarki Demihtrius ketin wiewiahiong mehn Suhs, kiht mehn Rom ntingihalahngehr kisinlikou kiset: ‘Dahme komw ketin kalokalokehki kompoakepaht mehn Suhs kan soangen kalokolok suwed pwukan? 32 Ma re pwurodo reht oh pwurehng kaulimkihla omwi tiahk sapwung kan, se pahn koasoanehdi oh utung ar pwung oh se pahn mahweniong komwi nansed oh nansapw.’ ”